Kashak

Retile registan me
jahan kisi marg ka
namonishan tak nahin dikhta
kidhar jayen manjil ko
koi rah na sujhta
thakte kadam wo bebas nigah liye
bhatka rahi jab nirash ho jata
us anant wo viran marubhumi me
rah dhund nikalta tab wah
aur bhatke rahi ko
manjil dikha jata.
Uski dridhnishchaya wo durdarshita ka
kayal jo jata har ek musafir
fir khud ko bhi khud par
garv kyon na ho aakhir.
Kalantar me use mila ek pathik
purntaya bhatki hui si
purnrupen nirash udas si.
Pathdarshak ke samne hote hi
nidhal ho gai wah puri tarah
jhakjhorne ke babjud bhi
palken nahi kholi usne
lambe safar ka katu anubhav
tha shayad uske pas
aatmiyata jatate hi fut pari
bhatkaw kyun ka har hal sunaya
santwana pakar chal pari sath
sahi manjil ki or par
wapsi par bhi sath na chhori
kuchh aur sath ka aagrah kar li
yachana aur katar najron ne
thore sath ki ijajat le li
samay ke sath sath
sath se samip ho li
fir chalne ko hui
ek anjane dagr par
jidhar jati koi pagdandi nahin.
Sara virodh bhi hua
fir nishprabhawi tab
uske snehil jidd ke aage jhuk kar
chal para wah bhi
ek ajnabi rah par.
Aur chalta hi gaya wah
dekha jab pichhe murkar
to hua ehsah
khud bhi bhatak gaya hai aaj
hairani se dekha charo or
nahin dikha us marusthal me
koi rah kisi or.
Wismit najro se jab
dekha us rahi ko
muskurahat ke sath wah
ho gayi aur karib wo
nigahen mili jab rahi se
parichay hua uske man ke
uthti girti lahron se.
Ehsas hua tab bhatak jane ka
ek bhatke rahi ke sath.
Bhatkaw dono me tha par
ek ko sukun tha to
duje ko kashamkash.
Apni sari shakti ekatra kar
punah koshish ki wapsi ki
use bhi samjhaya usne
jo sukh hai bhatke ko
sahi rah dikhane me
wah sukh kahan bhatakne me.
Shayad kuchh samajh wah
fafak pari aur
usse apnatwa ko pa
lipat gai amarbel ki tarah
stabdh ho gaya sara jahan
ek but ki tarah.
Thami jab udwelan
wapsi ko taiyar thi wah
abhi badha nahin tha pahla kadam
aur aa gaya achanak tufan
reton ka bhayankar tufan
daur pare fir dono
sahi rah ki khoj me
Hatho ki thi majbut pakar par
tufan ke aage ek na chali
bawandar ke thamte hi
rahi khud ko paya akeli
chintit ho najre daurayi
mil na sake koi nishan
uske anmol sathi ka
bahadbas wah dauri
royi, chillayi par
har kosish hua wayarth
antatah khud bhi chahi
marubhumi me ho jaun vilin.
Tabhi yad ho aayi use
uske we shabd ki
bhatkna nahin bhatke ko
sahi rah dikhana hai.
Fir sanbhali, aansu ponchhi
aur chal pari dhundhne
apne sahi rah ko
aaj bhi nibha rahi wah
apno ka adhura kartavya
de rahi ek anupam shradhanjali
rahi apne preet ko
dikha rahi hai us marubhumi me
bhatke musafir ko sahi dagar.
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=